تقييم شامل بريليانس V5-ميزات عيوب

رائي عربيه اكتر من ممتازه. ولايوجد بها هذه العيوب التي تقال. انا عندي ٢٠١٤ من سنتين ونصف. والحمدلله يادوب الصيانه. والعربيه عامله ١٢٠٠٠٠كم.وقطع الغيار رخيصه ومتوفره.

موديل ٢٠١٧ محترم جدا ثبات وفخمه وقوه .تكييف معقول .يعيبها ضعف الفرامل لكن مع استخدام قطع غيار اوكتافيا A4 تحسن الوضع.العزل بعد سرعة ١٢٠ سيئ.بتمسك تاكل بسرعه فى الصاج.العفشه ناشفه ..مجملا العربية ممتازه بالنسبه للفئات وسعرها.

موديلها الذي بدون فتحة سقف حتى أهرب من أي مشاكل حساسات لكن للاسف وجدت مشاكل أخرى كثيره

غيرت دينامو عند صيانة ال ٢٠ الف

غيرت ٢ قاعدة موتور وعلبة دريكسيون عند ال ٣٠ الف

غيرت مكنة زجاج وقطمة دريكسيون عند ال ٤٠ الف

ثابته على الطريق وعلى سرعات عاليه

عفشه ناشفه جدا جدا لدرجة اني بعتها بسبب عفشتها

متعة السواقه في السفر فقط

استهلاكها البنزين جيد جدا

سحبها مع بنزين ٩٥ جيد

ومع ٩٢ سئ جدا مما اطرني اني استعمل ٩٥

التكييف جيد

التوكيل كان متعاون واتحسن بعد ما أصبح م. عماد مسؤول عنه

عزلها جيد جدا

صالونها فخمه وخاماته جيده جدا

السيارة فيها ميزة أنها كبيرة وثابتة علي الطريق والمشكلة الأكبر أن الموتور ضعيف علي حجم البودي والعفشة خشنة جدا والفرامل ضعيفة ومبتوقفش العربية علي سرعة لأن التيل خامته رديئة حتي لو اصلي بس سعرها كويس

اولا : مراكز خدمة سيئة سيئة سيئة جدا لاترتقي انها تصلح تروسكلات مش سيارات

ثانيا : السيارة بها كمية من المشاكل التى لاحصر لها وعند ابلاغ مراكز الصيانة بها يستعبطوا ولا اكنهم سامعين حاجة

ثالثا : مصاريف كل صيانة اكني كنت بصين صاروخ سام سته – بياخدوا مصاريف كتيييييير جدا مش فاهم ليه

عربية رائعة كان عندي متتركس قبلها و احب اقول ان دي افخم بكتير باستثناء بعض الاصوات التي تحدث ساعات في المطبات لكنها مجرد صوت و اختفى الان. انصح بها و اللي بيقول غالية شوف السبورتاج بكام الهاي لاين الاول

انا امتلك السيارة من 2013 لم اري العيوب التي ذكرها بعض المستخدمين بهذه الصورة القاتمه قد ىكون هناك بعض الملاحظات اثناء الاستخدام وهذه لاتعتبر عيوب كبيرة لم يتكلم احد عن انتشار الواسع للسيارة في السوق المصري فهو ياتي من الاستخدام نرجو من التوكيل اصدار نشرة شهريه يوضح فيها المشاكل التي تواجه الناس وكيفيه التعامل معها

سياره بها مشاكل كثيره اولها الاسكترا ولوحه العداد وجميع الحساسات والجنوط وتيل الفرامل السياره من الاخر فاشله السياره على الطريق غير ثابته

السعر مناسب مقابل الجودة المتوسطة. الخامات رخيصة والفرامل صعيفة على الرغم من ابلاغهم بهذا العيب مع الصيانة الأولى ولكن العيب ظهر مرة أخرى. سنسور الايرباج معلّق وسنسور حزام الأمان بيعلق معظم الوقت.

لكن بصفة عامة السيارة مناسبة لمن يريد اقتناء سيارة كبيرة باقل سعر في السوق.

هل هذه مشاكل عامه ام فردية؟

تناولت كل الافكار وبحثت عن افضل الاسعار مع جودة مقبولة .وارى الان بعد قرائتى لتجاربكم انه لا يجب شراء السيارة برليانس .ربما ابحث عن اخرى.شكرا لتجابكم المنشورة وشكرا لاعلانكم عن حقائق مهمة من خلال تجارب مريرة

اطيب المنى

انا اشتريت فى شهر ماس الماضى سيارة V5 السيارة مكملتش 1500كم يعنى لسه بتلين و قطعت عدادات و علبة الدريكسيون بتخبط و فى خبطة فى العفشة لما باخد مطب مع ان سواقتى هادية خالص فعلا العربية الصينى صينى دى فعلا عربية فشلة و المشكلة كل ما بسئل حد عن العيوب اللى ظهرت يقلى ان عربيتة كدة كمان يعنى مش عيب فى عربية لا دا كل العربيات بيظه بجد دى شركة فاشلة و نصابة لان العربية غالية جدا على امكانيتها الكارينز برقبتها

بتاريخ 7/9/2014 ذهبت لعمل صيانة 40 الف كيلو بما تشتمل على تغيير سيور وزيوت وفلاتر …الخ بمركز القطامية – المهندس امير والهندس محمد حرانى وذكرت ان هناك مشكلة فى لمبتى الفرامل + لمبة ABS

انتهت الصيانة فى نفس اليوم وقال المهندس (امير والمهندس محمد حرانى ) بفرع القطامية ان المشكلة انتهت وان اللمبات الخاصة بنظام الفرامل لن تعود لتضىء وان نظام الفرامل ممتاز – ودفعت المطلوب مبلغ 1414 جنيه بخلاف مصروفات الغسيل الاخرى .

فى اليوم التالى مباشرة رجعت نفس المشكلة واضاءت نفس

اللمبتين مرة اخرى للفرامل ولنظام ايه بى اس للفرامل .

فى 9/9 /2014 توجهت مرة اخرى للفرع وقام بعمل اللازم مرة اخرى ووعد بإنتهاء المشكلة وسددت مبلغ 296 جنيه بالرغم ان هذه هى المرة الثانية وقاموا بتغيير الحساس الخاص بالفرامل وال ايه بى اس

بعد اسبوعين ظهرت المشكلة مرة ثالثة وتم التنسيق والذهاب للفرع مرة ثالثة لنفس العيب للاسف بتاريخ 29/9/2014

وبعد مضى يوم كامل ذكر المهندس محمد حرانى ان المشكلة انتهت وانه تم عمل بعض الضبط بالسيارة ورفض ذكره!!!.

للاسف فى نفس اليوم بعد المغادرة من الصيانة ظهرت المشكلة واضاءت اللمبتين الفرامل وال ايه بى اس – مما يثير القلق لان الموضوع موضوع فرامل وليس اى شىء اخر ويرتبط بأرواح من يركب السيارة – وللاسف لا استطيع استيعاب ان مركز صيانة كبير بحجم المجموعة البافارية لا يتسطيع عمل صيانة مثل ذلك – اضف الى ذلك انه بعد صيانة ال40 الف كيلو اصبح هناك صوت خشونة فى الموتور بعد تغيير السيور .

على ذلك قمت بعمل شكوى ورد على السيد عمرو من خدمة العملاء قبل العيد والمهندس محمد عبد الجليل ووعدوا بعمل ما يلزم الا نه حتى الان لم يتم اصلاح العيوب التى حدثت فى السيارة بسبب الصيانة الدورية بالتوكيل .

أسوأ ضمان وأوسخ توكيل بقالي 3 أشهر مع اني أخد موافقة من 5/08/2014 في الأسكندرية وفي الغردقة مش عارف أغير علبة الدريكسون v5 عشان موديل 2014 نازلة فيها العيب دة .. انا فعلا ندمت اني اشتريت العربية دي

انا فعلا ندمت اني اشتريت العربية دي brilliance v5

العربية على مستوى الخامات و التقفيل تستاهل السعر دة . خصوصا إن العربيات اللى فى الفئة دة فى المساحة السعرية دى مفيش منافس إلا الرينو داستر و تعتبر اقل فى الخامات اعلى فى القيمة السوقية .

الثبات دى إحدى مميزات العربيات البريليانس عموماً مفيش مشكلة فى النقطة دى .

السحب بتاع العربية التعليق العام إنها بطيئة فى التجميع يعنى بتوصل لسرعة 100 فى 15,6 ثانية خصوصا إن وزن العربية تقيل حوالى طن و نص او أكثر قليلاً . إقتصادية فى البنزين و دى ميزة المواتير المتسوبيشى

قطع الغيار معمرة و دة واضح من تعليق المستخدمين لعربيات بريليانس الموديلات الاخرى . قطع الغيار هتكون مشكلة فى المرحلة الاولى بس العربية لو اصبح لها سوق كويس هتلاقى قطع الغيار فى خارج التوكيل . التوكيل معروف مغلوانى علشان بيبع بى أم دبليو .

العفشة تعتبر بين الناشف و الناعم

الكورى لايزال متفوق فى سعر إعادة البيع و الانتشار و التكنولوجيا المستخدمة فى العربيات بس بخيلة فى الكماليات اللى متوفرة فى العربيات الصينى عموماً .

قريت كتير عن البريليانس V5 وبعد ما اشترتها من ٦ شهور و١٦٠٠٠ كم احب اقول ان العربية جيدة جدا بالنسبة لسعرها لان اللى بمواصفاتها اغلى بكتير

ايجابيات

مريحة وفخمة وعالية ومتزنة على الطريق وعزل للموتور وجسم السيارة ممتاز الكاسيت الجديد بالنافيجيتور والكاميرا خلاها حاجة تانية

سلبيات

صوت هوا من الباب عند ١٢٠كم

عفشة ناشفة نسبيا

نصحية اوعى حد يشترى(((( السيارة بيريليانس V5 ((الصينية))) فالسيارة بها عيوب فنية خطيرة وهذة العيوب هى ((((( علبة الدركسيون ،،، طقم العدادات ،،، والعفشة بالكامل ))) غير صالحة نهائيا للاستعمال ، انا اشتريت السيارة ده جديدة ، زيرو ،، وظهرت بها هذة العيوب ولم يمر على استعمالها عام واحدا ، والتوكيل والضمان لم يفعل شئ لي وعليه تقدمت بشكوى لجهاز حماية المستهلك ،،، وحررت محضر بقسم شرطة اول الغردقة ضد الشركة المستوردة والمنتجة للسيارة وذلك لانى السيارة بها عيوب خطيرة وتؤثر على السلامة العامة للمستهلكين وتعرض حياتهم للخطر