تقييم شامل سينوفا A1-ميزات عيوب

هل قطع غيارها متوفرة وفي متناول اليد ومراكز صيانتها متوفرة ؟

سياره ممتازه بالنسبه لسعرها والكماليات قليله الاعطال معنا من اخر 2015 سافرنا بها مرسي مطروح وشرم الشيخ جيدة على الطريق حتى سرعة 140 ولم نحاول زيادة السرعه عن ذلك

سيارة ممتازة وقليلة العطلات لكن يوجد خشونة في المطبات واهتزاز واضح في المحرك والتكيف ضعيف

سيارة قوية واقتصادية وقليلة العطلات

العربية ٤ سنين مشتكتش من حاجه موفره للبنزين وكفاءته ف كل شيء عاليه ما شاء الله جميله جدا

تقييمى للسيارة / سينوفا A113 سيدان فاشون اعلى فئة السعر 100.000 جم

———–

اولاً السعر مقابل القيمة

وجدت السيارة تتميز بالسعر المنافس مقارنة بمثيلاتها فى نفس الفئة اتراج ، سويفت ديزاير ،جراند أى تن ، بروتون ساجا

افيو ، فيرنا واليكم التقييم الشامل للسيارة

، كخامات داخلية ، وسع داخلى

6/10

استخدام الجلد اكثر كان هيزيد التقييم بالتأكيد ولاكن مستوى الخامات جيد فى هذة الفئة

الجلوس فى الامام مرضى جداً لطوال القامة وفى الخلف الجلوس مريح ايضاً هيكون لامس القدم بشكل بسيط عند رجوع الكرسى الامامى للخلف قليلاً بعد القائم

==============

الاداء واستجابة محرك السيارة ، الجيربوكس

7/10

اداء المحرك جيد مع التكيف و4 اشخاص فى السيارة وضغطت على العربية خاصة فى المرتفعات وكانت الاستجابة جيدة

الاداء على الطريق المستقيم والتسارع اكثر من جيد مفيش شعور بتأخر الاستجابة او شعور بنقلات السيارة العربية مش ممكن تخزلك ابداً لو بتفكر تتسارع بيها فى اى من المواقف الي تقابلها على الطريق

==============

الفرامل 8/10

تم استخدام الفرامل اكثر من مرة بشكل مفاجىء ومع التحميل لم اجد بطأ فى الاستجابة او تأخر فى التوقف السرعة انخفضة فى لحظات

==============

الكماليات والتجهيزات

7/10

كل الاوبشن الاساسى موجود بالاضافة لبعض الاضافات مثل فتحة السقف وتكييف اتوماتيكى وشاشة ملتميديا وازرار التحكم + وسائل الامان متوفرة بالكامل ودة شىء مطمئن جداً عند الشراء – كان ليا ملحوظة وهى مفيش امكانية لفتح الشنطة من الداخل والفرش قماش

==============

مساحة الشنطة جيدة جداً 8/10

ومع خاصية طى الكنبة الخلفية فهى مناسبة لحمل اكثر من غرض وعمقها كبير

==============

انظمة التعليق 8/10

اتزان وثبات السيارة اكثر من جيد ومفيش احساس بالطريق ملحوظ وبسبب ارتفاع السيارة المش كبير اثر بالايجاب على ثباتها عند التسارع

==============

العزل 6.5/10

لايوجد اصوات تدخل الكابينة الا قليلاً وصوت المحرك مع الكيك داون مسموع ولاكن جيد وغير مزعج

==============

سلاسة القيادة وأبعاد السيارة الخارجية 10/10

بنصح بيها اى مقبل على شراء أول سيارة لية العربية فيها حساسات ركن وابعادها سهل رؤيتها من اول مرة مفيش اى صعوبة فى الرؤية سواء المرايات الجانبية الرؤية من الزجاج الخلفى الشنطة غير مرتفعة وسهلة الركن والمناورة

==============

التكييف 6/10

تم تجربة التكييف فى جو اليوم الكان حر جداً مع وجود 4 فى السيارة تقييمى ولا يأثر على اداء السيارة الا فى المطالع قليلاً

==============

under the Hood

مستوى التقفيل لاجزاء المحرك 7/10

انا شايف ان الاسلاك مش واضحة بشكل مزعج واللحامات والخامات المستخدمة ليست من النوع الردىء كما رأيت فى بعض الماركات الصينية الاخرى ، اغلب الاجزاء مغطاة بشكل جيد والعوازل واللحامات خامات جيدة

==============

ارتفاع السيارة عن الارض 6/10

ارتفاع السيارة جيد وبعد التحميل عددنا 4 بتنخفض قليلاً ولاكن مع ارتفاع

154 ملم فالامر مقبول وليست منخفضة بشكل مزعج

مبدائيا العربيه في المجمل رائعه.

تقيمي هيكون درجات و بعض تعليقات اذا وجب الأمر.

1-الشكل الخارجي 810

->شكل انسيابي و في خطوط بطول عربيه و في الكبوت دا بيساعد في ثبات العربيه الواضح جدا علي طريق.

2-الشكل الداخلي 710

->كان ممكن يكون اكثر جذابيه خصوصاً التابلو و شاشه بس مجمل جميل و هادئ

3-الخامات الداخليه 6/10

-> دا العادي في فئه سعريه دي مع اني شايفو مش بطال هو في بعض ملاحظات صغيره بس جميل.الحته اللي فوق شاشه مباشره هي اضعف مكان في تابلو.لكن مقارنه بالوجان و فيرنا تقريبا واحد بختلف طريقه معالجه بلاستيك.

4-التقفيل الخارجي و الموتور 8/10

->تقفيل الصاج مع فوانيس و الأبواب ممتاز اللهم فروقات بسيطه من ناحيه فوانيس القدام بس دا العادي.تقفيل موتور ياخد رقم واحد في كل عربيات فئه دي ممتاز جدا و فنش رائع.

5-التقفيل الداخلي 6/10

-> لو هقارنها بفيرنا سينوفا تكسب بجداره لو هتتقارن بالوجان بردو سينوفا تكسب لكن صراحه لوجان بلاستيك اقوي لكن بينزل علي فراغ.تقفيل داخلي فخم واختيار تصميم جميل.في بعض ملاحظات خصوصا تقفيل اسفل الأرجل كراسي الأماميه.

6-الأمكانيات 9/10

لو كانت فيها مثبت سرعه كانت خدت العشره كملين.طبعاً فيها اوبشنز غير معدوده و غير موجوده في فئات تانيه.

7-أداء موتور 810

موتور من الوهله الأوله تحس بعفويه في و احساس بالسرعه.موتور عفي وشديد واستجابه ممتازه وسحب رائع.زرار سبورت مود دا اختراع بيخلي عربيه تطير

كل ملاحظاتي صوت موتور عالي شويه خصوصا مع سبورت مودد

9-الفتيس 10/10

-> نقلات تكاد تكون غير مسموعه او محسوسه بالمره.استجابه سريعه في وقت قياسي.

8- أداء السياره عموما 9/10

->ثبات رائع جداً بدون مبالغه وصلنا ل 150 و عربيه ولا اي اندهاش و كان الهوا عكسنا و كانت ثبته جداً..قاعده سواق مريحه و تديك ايحاء بسواقه رياضيه مع صوت موتور.كل اوبشنز العربيه في متناول يد السائق وسهل الوصول اليه.

القاعده مريحه جدا ورا وقدام.في مجمل جميله السياره.

9-الفرامل 9/10

->من 150 الي صفر في ثواني معدوده.الفرامل بتلم بسرعه رهيبه و بثبات عالي جداً.طبعا ABS +EBD بيلعبو دور الأكبر في سرعه توقف.

10-الأحساس العام 9/10

->مرضي جداً والحمد الله.السياره تستحق الأقتناء.

11-فتحه سقف 10/10

->😂احساس رائع فتحه سقف دي

تجربة السينوفا معايا من اولها…بدأت بانى شوفتها فى اوتوماك فى اول زيارة…الحقيقة زغللت عينى.. وروحت شوفت زمايلها..وبقيت المقارنى بين ال Senova والJAC والغريب ان الاتنين بتوع القصراوى… زى كل الناس ما بتعمل…شوية مقارنات وفرجة على فيديوهات و زيارات عشان اشوف العربية فى المعارض واسمع رأى البياعين والزوار…!! المهم انى استقريت على الوحش Senova HB Fashion …اتفقت على الاستلام من ابو رواش وكله تمام….رحت لقيت كل الناس مبتسمة جدا و ترحيب هايل من المبيعات والصيانة وكل اللى فى المكان… العربية كالعادة بيبقى فيها شمة بنزين يا دوب تخرجك لغاية بره المركز..(وطبعا دى تعليمات الأمن الصناعى فى كل منطقة ابو رواش) الحقيقة الناس حطو للعربية شوية بنزين يجى لترين وقالولى لغاية ما توصل المحطة اللى بره….المهم الظاهر انى عديت المحطة…قولت عادى اطلع اخد بنزين من محطة الامارات اللى على الصحراوى…وكنت ناسي ان المحطة قبل مدخل ابو رواش مش بعده.. كل ده ولمبة البنزين بتدى فلاش (بتقولى ارحم اهلى)

عشان ما أطولش…سرحت العملية معايا شويتين لغاية ما وصلت لأول كوبرى للدوران (حوالى 20 كم) ورجعتهم تانى…وقولت خلاص اخد البنزين من مدخل اكتوبر..

المهم..اخدت البنزين 47 لتر يعنى العربية كانت ماشية على بخار البنزين اللى فى التانك

بعدها روحت بيها المهندسين وقولت طيب ادخل اشوف الاستهلاك اخباره ايه…العربية ما قبلتش تاخد ولا نقطة (المسافة حوالى 18 كم) يعنى ممكن تاخد لها لترين مثلا…لآ.. ما اخدتش حاجة والبنزين طلع بره على طول..

على آخر النهار قولت اطلع بيها مشوار طوالى… وفعلا وصلت بيها لغاية اسكندرية وقولت مش ها أحط بنزين من هناك واشوف هاتوصلنى لغاية فين… (بعد القهوة والذى منه) لفيت ورجعت ووصلت المهندسين ودخلت المحطة ( العربية اخدت 29 لتر)

بالنسبة للثبات على الطريق…ما شاء الله…حاجة ممتازة….

الrpm تقريبا على 3000 متوسط السرعة 130 – 140..

عزل الصوت معقول قوى

استجابة العربية للkick down هايلة (مع انى با تكلم على عريية اوتوماتيك)

العربيه ممتازه فى السفر… فى اجازه العيد سافرت من المنيا للقاهره قضيت يومين بتحرك بيها جوه القاهره وطلعت على اسكندريه ورجعت على المنيا باجمالى كيلوات ١٠٠٠ كيلو تقريبا.. العربيه بكامل حمولتها والشنطه تقريبا مليانه.. سحب ممتاز واستجابه سريعه حتى مع التكيف.. التكيف ممتاز وكتير بهديه عشان بيبقى ساقع جامد.. استهلاك بنزين رائع بمتوسط ١٢.٨ كيلو للتر جوه وبره البلد مع التكيف ومتوسط سرعه على السريع ١٣٠ .. اتزان ممتاز فى المناورات وكنت بتعمد اعمل غرز على سرعات كبيره.. العربيه واسعه و٥ افراد بيبقوا مرتاحين.. العربيه مع التحميل بتهبط جامد وبتحك فى المطبات الرخمه وبتفرق جدا لما تظبط الكاوتش على ٣٣ بيرفع العربيه شويه ومع ذلك العفشه ناعمه جدا ومش بتدبدب فى النقر .. الفرامل رجعت تصفر بس اداءها ١٠/١٠.. العربيه مانيوال ١٥٠٠ وبعد الفسحه دى تبقى عملت ٥٢٠٠ كيلو